الفرق بين الجبس بورد والجبس البلدي المميزات والعيوب
ملخص حكاية الجبسيوم بورد في كام سؤال وإجابة
يارب تعجبكوا و تستفيدوا اعمل "#منشن" لصاحبك اللي بيشطب
1- الجبسيوم بورد و السقف الساقط طالع موضة ؟!
لا ملوش علاقة بالموضة خالص .
أمال إيه ؟
هو وسيلة لتشطيب السقف زيها زي المصيص و الجبس البلدي .
2- طيب ايه الجديد فيه ؟
بص يا سيدي الجبسيوم بورد كان موجود من زمان و لكن تكلفته مقارنة بالجبس_البلدي كانت كبيرة لكن دلوقتي اصبحت قريبة جدا .
3- إزاي ؟
الجبس البلدي عشان تعمله بياخد وقت كتير يعني " يوميات كثيرة " و يوميات العمال زادت جدا و في نفس الوقت الجبسيوم بورد مبايخدش الوقت ده خالص
يعني لو هاتعمل الشقة بتاعتك جبس بلدي في شهر تقدر تخلصها بالجبسيوم بورد في اسبوعين
4- طيب بالنسبة للجودة الجبسيوم بورد أحسن و لا الجبس البلدي ؟
طبعا الجبسيوم بورد الجودة بتاعته اعلي بكتير لانه مش معتمد علي حرفة الصنايعي الألواح بتيجي مكبوسة جاهزة من المصنع فلا هاتلاقي لوح " مموج و لا معرج و لا فيه رايش ده غير ان فيه انواع مقاومه للرطوبه " الجبس الاخضر " و انواع مقاومه للحراره " الجبس الاحمر " .
5- الجبسيوم بورد بيتركب ازاي ؟
يتعمله نظام تعليق تسليح صاج في السقف الأساسي و بعد كده بنركب في الجبس بمسامير و بعد كده يتشطب بمعجون الفواصل .
6- أنا سمعت إن الجبسيوم بورد بيتشرخ و يشقق مع الوقت ؟
ده بيحصل لسبب واحد " قلة الضمير او عدم المعرفة "
1-إن الصنايعي يقلل في الصاج بتاع التسليح في السقف يشرخ و يريح .
2-إن الصنايعي مايستخدمش فايبر الفواصل .
7- في مميزات تاني تخليني أشتغل جبسيوم بورد غير الوقت و التكلفة ؟
أه طبعا
انت بتخلق فراغ بين السقف العادي و السقف الجبسيوم بورد و ده بيديك الفرصة انك تركب " اسبوتات دفن ، سماعه ، تكيفات_كونسل"
و الفراغ ده بيخلي عندك ميزة انك ممكن في اي وقت بعد التشطيب تمشي سلك في السقف " تليفون ، نت ، فايبر كهرباء " .
8- بالنسبة لو عايز أفصل غرفة أو أقسم ريسبشن ؟
بتعمل قاطوع جبسيوم بورد بيفصل بين الغرف بيبقى زي الحيطة بالظبط و يتشطب دهانات او ورق_حائط او اي تشطيب من الناحيتين .
9- طب إستخدمات الجبسيوم بورد في الديكور ؟
الميزة دايما في أني اقدر اعمل كذا نظام اضاءة سبوتات او -ليد لايت و طب.... بتشتغل في الديكور زي الفل .
وفى اى رسومات زى الورود والفرشات .
10- طيب يتحسب إزاي ؟
1-يتحسب بالمتر المسطح المساحات الفلات .
2-أما الديكور أو أي زوايا نازلة أو طالعة يتحسب بالمتر الطولي .
11- إيه الأنواع الكويسة في الجبس ؟
(-كناوف-تركي-بلاكو-سعودي)
12- الأسعار إيه ؟!
دلوقتي السعر بيبدأ من 130 إلي 160 جنيه و ممكن توصل لحد 260ج بس بانظمة تعليق مختلفه
خلي بالك حاول قبل ما تبدأ يبقى معاك الرسومات النهائية عشان ممكن تبقى مختار شكل و لما يتنفذ تلاقي النسب بتاعته متنفعش عندك
و تبقي عارف الكمية كام و التكلفة النهائية كام قبل ما تبدأ عشان تكون محدد كل شي..
او كلمنا واتس . 01276443900
تعليقات
إرسال تعليق